Já þú last rétt!

Kopi Luwak er unnið úr baunum sem Luwak (civic kettir) hafa melt. Luwak kaffi þykir eitt fínasta kaffi sem völ er á og er með því dýrasta í heimi. 

Með nef fyrir gæðum

Luwak kettir hafa þróað með sér nef sem getur þefað uppi allra bestu kaffiberin í hverri kaffiplöntu fyrir sig. Þeir éta þau en skilja hin svo eftir. Berin ferðast í gegnum meltingarkerfið þar sem hátt sýrustig, ensím og önnur efni hafa áhrif á kaffibaunirnar.

Handplokkaður úrgangur

Baunirnar eru handplokkaðar úr úrgangnum og þvegnar. Nú eru þær tilbúnar til ristunar. Þær eru því annað hvort seldar til ristara um heim allan eða ristaðar á staðnum.

Margfalt dýrara en venjulegt kaffi

Luwak baunirnar kosta sirka 30 sinnum meira frá framleiðanda. Luwak bolli á kaffihúsi Í Bandaríkjunum kostar á milli 35-100 dollara (4.000 - 12.000 krónur). Það er mikil eftirspurn eftir Luwak kaffi og framboðið er af skornum skammti. Þrátt fyrir hátt verð hefur fólk mikinn áhuga og flestir virðast vilja prófa.

Heimsóttum kaffiframleiðanda í Indónesíu sem sýndi okkur Luwak framleiðsluna

Í Nóvember heimsóttum við kaffiræktanda í Ubud, Indónesíu. Þeir sýndur okkur hvernig Luwak kaffi er búið til og við fengum að sjálfsögðu að smakka.

Bollinn lýtur meira út eins og kakó á að líta en kaffi. Hann bragðaðist mjög vel, en ég verð samt að viðurkenna að ég hefði aldrei borgað í kringum 10 þúsund krónur fyrir hann. Bollinn kostar þó ekki nema um 1500 kr hérna í Indónesíu.

Kopi Luwak og Kopi Luwak þarf ekki að vera það sama

Það eru til margar týpur af Luwak köttum og gæði berana fer að sjálfsögðu eftir því hvort kettirnir eru staðsettir hjá gæðaplöntum. Auk þess er gott að hafa í huga að það er frekar algengt að fyrirtæki selji falsað Luwak kaffi og því mikilvægt að athuga vel með upprunan ef þú ákveður að kaupa Luwak annarstaðar en beint frá ræktanda.

Lítill fróðleiksmoli

Að lokum vil ég benda ykkur á að "kopi" þýðir kaffi. Sjálfur var ég svo vitlaus þegar ég mætti hingað til Indónesíu að ég spurði um "Kopi Luwak coffee", sem þýðir í rauninni "Luwak kaffi, kaffi".